حبيت نعمل تقديم صغير بالعربي/الدارجة للموقع هذاية... بعد "يوم الجلاء من الماء" الناجح (رغم سرعة التنظيم) من حيث التفاعل مع مبادرة خونا "كلاندستينو" و "حاكم النورمالاند" و "فري رايس" و العبدو لله و إلي شارك في النقاش فيها كذلك عديد المدونين... اقترح علينا "حاكم النورمال لاند" مواصلة الحديث على الموضوع... و على هذا الأساس بادر هو مع "أزواو" و العبدولله لتأسيس موقع لحفظ ذكرى الحدث المأساوي الخاص بفياضانات 13 أكتوبر الجاري و تساهم معانا أيضا أختنا سنية "نوفراج" في تصميمو... و المغزى من حفظ الذكرى لهنا مش مجرد تكرار الحديث على إلي جرى أو الترحم على الناس إلي كانوا ضحايا للفيضانات (هذاية الكل طبيعي بش نعملوه لهنا) و لكن زادة لمواصلة الحديث على المشاكل إلي تظهر بسيطة في حياتنا اليومية (كيف مثلا بالوعات المياه و الزيقووات) و لكن إلي يجي نهار و تظهر الأهمية متاعهم و حتى خطورتهم كيفما جرى للأسف نهار 13 أكتوبر.. حبيت نقول إلي هذاية موقع مفتوح للجميع للمساهمة من خلال كتابة آرائكم و خواطركم و حتى تجارب عشتوها و إلا تعيشوها في علاقة بمؤسسات معينة أو آليات تلاحظو فيها البيروقراطية و عدم أو قلة الفاعلية (أو كذلك أخذ صور و التقاط صور فيديو إذا حبيتو في المواضيع هذية)... و إلا على أي موضوع تختاوره يتماشى مع الهدف الأساسي من الموقع: و إلي هو قيام المواطن بواجبو في ملاحظة ما يجري حولو خاصة فيما يتعلق بالمرافق ذات الشأن العام... يعني نقترحو تكون تجربة تشبه من حيث الشكل تجربة موقع بودورو... و في الحالة هذية ما ناش نتصورو في أنفسنا موقع إعلامي بالمعنى التقني للكلمة و إلا بديل عن الإعلام... بقدر ما نشوفو في أنفسنا تعبير عفوي (غير مسيس أو يسعى للمزايدة) على الرغبة الفطرية في أي كائن بشري لمحاول تصحيح أو تعديل (و لو بالكلمة) ما يرى أنو غير سوي أو غير مناسب....
Inscription à :
Publier les commentaires (Atom)
Aucun commentaire:
Enregistrer un commentaire